Vakstrarforum

Endamálið við Vakstrarforum er at birta upp undir virðisøking í siðbundnu vinnunum og alternativum framtíðarvinnum í Føroyum á burðardyggari grund. Vakstrarforum er tíðaravmarkað til hálvt annað ár – tað skal virka frá februar 2021 til juni 2022, tá ið ítøkilig uppskot um virðisøking skulu vera komin burturúr. Stovnan av vakstrarforum er ásett í samgonguskjalinum.

Ein samanumtakandi frágreiðing verður eftir ætlan liðug á sumri 2022. Vakstrarforum er samansett av fólkum við servitan úr ymiskum vinnugreinum, arbeiðsmarknaði, gransking, íverksetan, orku, burðardygd og øðrum.

Vakstrarforum eftir ætlan fýra  fundir í 2021. Virksemið hjá Vakstrarforum er tó ikki avmarkað til høvuðsfundirnar. Vakstrarforum setir fokusbólkar at arbeiða málrættað og meira ítøkiliga við ávísum møguleikum, avbjóðingum ella uppskotum, sum eru komin fram í Vakstrarforum.

Løgmansskrivstovan og Umhvørvis- og vinnumálaráðið samskipa arbeiðið.

Havið sum vakstrarøki

Á fyrsta fundinum hjá Vakstrarforum, sum varð hildin 12. februar 2021, var ein niðurstøða, at Vakstrarforum skuldi at arbeiða við havinum sum vakstrarøki. Ein arbeiðsbólkur, havbólkurin, er settur. Arbeiðssetningurin hjá havbólkinum er:

"Havbólkurin skal vísa á, hvussu enn størri virði kunnu gagnnýtast úr havinum á ein burðardyggan hátt, og hvussu hetta best gerst táttur í einum ringbúskapi. Bólkurin skal eisini vísa á nýggj vakstrarøki, sum eru knýtt at havinum og eyðmerkja, hvørjir karmar eru fyritreyt fyri, at vøksturin á einstøku økjunum kann gerast veruleiki.

Bólkurin skal gera tilmæli um, hvat kann gerast beinanvegin og hvat kann gerast sum frá líður (longri sikt) fyri at skapa virðisvøkstur úr havinum.”

Í havbólkinum eru hesi limir:

• Niels Winther, formaður

• Unn Laksá

• Janet Johannesen

• Jákup Mørkøre

• Leif av Reyni

Rógvi Olavson, fulltrúi á Løgmansskrivstovuni, er samskipari og skrivari hjá bólkinum.

Á næsta fundi í Vakstrarforum, sum verður 16. apríl, fer umboð fyri havbólkin at leggja fram íkøst til Vakstrarforum at umrøða.

Havbólkurin letur úr hondum síni tilmæli og frágreiðing á fundi í Vakstrarforum, sum verður 4. juni.