LØGMANSSTJÓRI
Sóknast verður eftir dugnaligum, ágrýtnum og framskygdum persóni at stjórna Løgmansskrivstovuni og vera hollur ráðgevi hjá løgmanni í hansara yrki sum stjórnarleiðari
Løgmansskrivstovan er fyrisiting løgmans, sum er ovasti leiðari í Føroya landsstýri. Løgmaður varðar av stjórnarmálum sambært stýrisskipanini og lógarmálum. Høvuðsendamálið hjá Løgmansskrivstovuni er at veita løgmanni ráð, tryggja haldgott grundarlag og gera hugskot og politisku málini til veruleika.
Løgmansstjórin er ovasti ráðgevi løgmans og hevur ábyrgdina av dagligu leiðsluni, menningini og rakstrinum av Løgmansskrivstovuni. Hann er eisini fremstur millum ovastu stjórarnar í fyrisitingini og hevur ein serligan leiklut í at tryggja, at samlaða landsstýrisfyrisitingin hongur væl saman.
Høvuðsuppgávur
Leiða og samskipa arbeiðið á Løgmansskrivstovuni
Ráðgeva løgmanni og tryggja, at hann hevur neyðugu serfrøðina til taks soleiðis, at hann kann útinna løgmansembætið á fullgóðan og lógligan hátt
Fremja eftirlit løgmans við landsstýrisfólkunum sambært stýrisskipanarlógini
Samskipa og fyrireika uppgávur í omanfyri nevndu málum
Fyrireika lógir, kunngerðir og reglugerðir á virkisøki løgmans
Eftirlit við stovnum undir Løgmansskrivstovuni
Faklig førleikakrøv
Viðkomandi akademiska útbúgving
Útbúgving ella eftirútbúgving í leiðslu og/ella leiðsluroyndir á høgum stigi
Vitan um tær treytir, sum eru galdandi í eini politiskari fyrisiting
Góðan kunnleika til almenna fyrisiting
Politiska og samfelagsliga heildarfatan og evni at ráðgeva á hesum økjum
Evni at raðfesta strategiskt og skapa úrslit tvørtur um almenna geiran
Hegni at samskifta og málbera seg væl á føroyskum, donskum og enskum máli
Leiðslu- og persónligir eginleikar
Nútíðar leiðslueginleikar
Náttúruligan myndugleika og jaligan hugburð
Evni at eggja og menna leiðarar og starvsfólk og fáa tey at trívast
Er treyst/-ur og letur seg ikki lættliga taka av fótum, tá ið nógv stendur á
Dugir væl at lurta og at handfara ósemjur
Dugir væl at samstarva og hava savnandi framferðarhátt
Er holl/-ur og væl skipaður í sínum arbeiðshátti
Starvs- og persónsprofilurin til løgmansstjórastarvið kann lesast her.
Setanarviðurskifti
Starvið er tænastumannastarv. Starvsheitið er løgmansstjóri og er flokkað í 40. lønarflokki. Harumframt er ein mánaðarlig viðbót uppá kr. 5.825,65. Viðbótin er ikki eftirlønargevandi.
Nærri upplýsingar fáast við at venda sær til Marjuna Hanusardóttir, tlf. 551030.
Umsóknir við upplýsingum um útbúgving, royndir og møgulig viðmæli skulu stílast til løgmann, og sendast Løgmansskrivstovuni, Tinganes, Postrúm 64, 110 Tórshavn ella lms@lms.fo í seinasta lagi 31. mai 2021.